mahsus jo hota hai ki hum hain bhi nahin bhi

mahsūs jo hotā hai ki ham haiñ bhī nahīñ bhī

dekho to jo ham aaise hoñ do chaar kahīñ bhī

auhām ke asrār bhī kuchh kam nahīñ gahre

chakkar meñ bahut aa.e haiñ kuchh ahl-e-yaqīñ bhī

az-roz-e-azal hai ki nahīñ hai kā hai mahshar

aur is kā javāb aaj bhī haañ bhī hai nahīñ bhī

jo baat samajh le vo kahīñ bhī na milegā

ghuum aao jidhar chāho chale jaao kahīñ bhī

iqrār bhī inkār bhī par tol rahā hai

parvāz se larzāñ hai mirī haañ bhī nahīñ bhī

āfāq jhukā aa.e jahāñ baiThe hoñ chup-chāp

bas ham se bahut tañg falak bhī hai zamīñ bhī

tā-hadd-e-nazar naqsh-e-qadam bhī nahīñ miltā

har sañg se zāhir koī rūdād-e-jabīñ bhī

jo naqsh-e-qadam vaqt ke haiñ ret pe ai 'talḳh'

kuchh aaise falak par bhī haiñ kuchh zer-e-zamīñ bhī

mahsus jo hota hai ki hum hain bhi nahin bhi

dekho to jo hum aaise hon do chaar kahin bhi

auham ke asrar bhi kuchh kam nahin gahre

chakkar mein bahut aae hain kuchh ahl-e-yaqin bhi

az-roz-e-azal hai ki nahin hai ka hai mahshar

aur is ka jawab aaj bhi han bhi hai nahin bhi

jo baat samajh le wo kahin bhi na milega

ghum aao jidhar chaho chale jao kahin bhi

iqrar bhi inkar bhi par tol raha hai

parwaz se larzan hai meri han bhi nahin bhi

aafaq jhuka aae jahan baiThe hon chup-chap

bas hum se bahut tang falak bhi hai zamin bhi

ta-hadd-e-nazar naqsh-e-qadam bhi nahin milta

har sang se zahir koi rudad-e-jabin bhi

jo naqsh-e-qadam waqt ke hain ret pe ai 'talKH'

kuchh aaise falak par bhi hain kuchh zer-e-zamin bhi