مہتاب ہے بہار ہے ساقی ہے جام ہے

مہتاب ہے بہار ہے ساقی ہے جام ہے

کتنا سکون دل کے لئے انتظار ہے

ہر راہ کہکشاں کی طرح ہے سجی ہوئی

ہم راہ میرے کون یہ محو خرام ہے

ساقی کی چشم مست پلاتی رہے جسے

اس بادہ کش کو جام سے پینا حرام ہے

کیوں کر نہ راہ عشق میں وہ سربلند ہو

قسمت میں جس کی گیسوئے جاناں کی شام ہے

کھلنے لگے ہیں پھول مرے دل کی شاخ پر

شاید کوئی حسیں ہے جو بالائے بام ہے

ہر سمت جلوہ ریز ہے حسن و جمال یار

اے بے خودیٔ عشق یہ کیسا مقام ہے

کرتے ہیں قتل سب کو نگاہوں کے تیر سے

ان مہ وشوں کے پاس یہی ایک کام ہے

ادنیٰ سا اک کرشمہ ہے تیری نگاہ کا

صحن‌ چمن میں موسم گل جس کا نام ہے

خالی کوئی بھی ساغر دل رہ نہ جائے گا

شبیرؔ آج بادۂ دیدار عام ہے