محو خواب حال ہیں تعبیر مستقبل سے دور

محو خواب حال ہیں تعبیر مستقبل سے دور

خفتہ ذہنی نے کیا ہے کس قدر حاصل سے دور

کچھ خبر بھی ہے تجھے او گوشہ گیر و معتکف

راہرو کتنے بھٹک کر ہو گئے منزل سے دور

اصل میں تو اپنے دل ہی سے نہیں ہے باخبر

ورنہ اے ناداں نہیں ہے کوئی بھی شے دل سے دور

نیت صادق سلامت جذبۂ کامل بخیر

دور ہے کب تم سے منزل کب ہو تم منزل سے دور

زندگی ہے اک مسلسل سوز پیہم اضطراب

سعیٔ حاصل سے قریب اور سعئ لا حاصل سے دور

دل میں ہے عزم مسلسل عزم میں پیہم تڑپ

ہیں وہی کچھ پاس منزل کے جو ہیں منزل سے دور

اے شفاؔ آسانیاں ملنا کوئی آساں نہیں

مشکل آتی ہے تو ہوتی ہے بڑی مشکل سے دور