mahw-e-KHwab-e-haal hain tabir-e-mustaqbil se dur

mahv-e-ḳhvāb-e-hāl haiñ tābīr-e-mustaqbil se duur

ḳhufta-zehnī ne kiyā hai kis qadar hāsil se duur

kuchh ḳhabar bhī hai tujhe o gosha-gīr-o-mo.atakif

rāh-rau kitne bhaTak kar ho ga.e manzil se duur

asl meñ tū apne dil hī se nahīñ hai bā-ḳhabar

varna ai nādāñ nahīñ hai koī bhī shai dil se duur

niyyat-e-sādiq salāmat jazba-e-kāmil ba-ḳhair

duur hai kab tum se manzil kab ho tum manzil se duur

zindagī hai ik musalsal soz-e-paiham iztirāb

sa.ī-e-hāsil se qarīb aur sa.i-e-lā-hāsil se duur

dil meñ hai azm-e-musalsal azm meñ paiham taḌap

haiñ vahī kuchh paas manzil ke jo haiñ manzil se duur

ai 'shifā' āsāniyāñ milnā koī āsāñ nahīñ

mushkil aatī hai to hotī hai baḌī mushkil se duur

mahw-e-KHwab-e-haal hain tabir-e-mustaqbil se dur

KHufta-zehni ne kiya hai kis qadar hasil se dur

kuchh KHabar bhi hai tujhe o gosha-gir-o-moatakif

rah-rau kitne bhaTak kar ho gae manzil se dur

asl mein tu apne dil hi se nahin hai ba-KHabar

warna ai nadan nahin hai koi bhi shai dil se dur

niyyat-e-sadiq salamat jazba-e-kaamil ba-KHair

dur hai kab tum se manzil kab ho tum manzil se dur

zindagi hai ek musalsal soz-e-paiham iztirab

sai-e-hasil se qarib aur sai-e-la-hasil se dur

dil mein hai azm-e-musalsal azm mein paiham taDap

hain wahi kuchh pas manzil ke jo hain manzil se dur

ai 'shifa' aasaniyan milna koi aasan nahin

mushkil aati hai to hoti hai baDi mushkil se dur