mahw-e-naghma mera qatil jo raha karta hai

mahv-e-naġhma mirā qātil jo rahā kartā hai

fann-e-mausīqī ko bhī zab.h kiyā kartā hai

ik vo zālim hī nahīñ mujh pe jafā kartā hai

āsmāñ bhī isī chakkar meñ rahā kartā hai

bārish-e-kaif-o-tarannum kā samāñ kyā kahiye

naġhma jaise lab-e-mutrib se chuā kartā hai

ab to har baat pe qur.ān uThā lete haiñ

ab to īmān sipar ban ke bikā kartā hai

uTh gayā mai-kade se shīsha-o-sāġhar kā rivāj

ab to chullū se har ik riñd piyā kartā hai

saath tasbīh ke dānoñ ke sunā hai ham ne

shaiḳh biryānī kī boTī bhī ginā kartā hai

maiñ jahāñ meñ kisī aa.iin kā pāband nahīñ

mere ghar aap hī qānūn Dhalā kartā hai

kyuuñ na vā'iz ke taqaddus kā asar ho dil par

roz mai-ḳhāne meñ tasbīh paḌhā kartā hai

jis ko samjhe hue the sidq-o-safā kā haamī

jhuuT kī rassī vahī roz baTā kartā hai

azm-bil-jabr ke hāthoñ jo huā ho raushan

vo diyā bhī kahīñ jhoñkoñ se bujhā kartā hai

allāh allāh ye me'rāj-e-mohabbat ai 'shauq'

husn ab ishq kā paanī hī bharā kartā hai

mahw-e-naghma mera qatil jo raha karta hai

fann-e-mausiqi ko bhi zabh kiya karta hai

ek wo zalim hi nahin mujh pe jafa karta hai

aasman bhi isi chakkar mein raha karta hai

barish-e-kaif-o-tarannum ka saman kya kahiye

naghma jaise lab-e-mutrib se chua karta hai

ab to har baat pe quran uTha lete hain

ab to iman sipar ban ke bika karta hai

uTh gaya mai-kade se shisha-o-saghar ka riwaj

ab to chullu se har ek rind piya karta hai

sath tasbih ke danon ke suna hai hum ne

shaiKH biryani ki boTi bhi gina karta hai

main jahan mein kisi aain ka paband nahin

mere ghar aap hi qanun Dhala karta hai

kyun na wa'iz ke taqaddus ka asar ho dil par

roz mai-KHane mein tasbih paDha karta hai

jis ko samjhe hue the sidq-o-safa ka hami

jhuT ki rassi wahi roz baTa karta hai

azm-bil-jabr ke hathon jo hua ho raushan

wo diya bhi kahin jhonkon se bujha karta hai

allah allah ye me'raj-e-mohabbat ai 'shauq'

husn ab ishq ka pani hi bhara karta hai