mahw-e-nazzara-e-hairat hai hawa pahli bar

mahv-e-nazzāra-e-hairat hai havā pahlī baar

mujh pe darvāza-e-mahtāb khulā pahlī baar

hijr kī shab se bahut duur sar-e-matla-e-shauq

ab ke tanhā.ī meñ vo mujh se milā pahlī baar

ab na ehsān kareñ mujh pe ye kaalī rāteñ

is añdhere meñ jalā koī diyā pahlī baar

ab dhanak-rañg bahut saaf nazar aate haiñ

apne ā.īne meñ aa.ī hai jilā pahlī baar

ik haqīqat ne kiyā ḳhvāb sā jaadū mujh par

aur maiñ der talak sotā rahā pahlī baar

aur phir dasht-e-junūñ mujh ko bahut yaad aayā

chāk-e-dāmāñ jo abhī maiñ ne siyā pahlī baar

mahw-e-nazzara-e-hairat hai hawa pahli bar

mujh pe darwaza-e-mahtab khula pahli bar

hijr ki shab se bahut dur sar-e-matla-e-shauq

ab ke tanhai mein wo mujh se mila pahli bar

ab na ehsan karen mujh pe ye kali raaten

is andhere mein jala koi diya pahli bar

ab dhanak-rang bahut saf nazar aate hain

apne aaine mein aai hai jila pahli bar

ek haqiqat ne kiya KHwab sa jadu mujh par

aur main der talak sota raha pahli bar

aur phir dasht-e-junun mujh ko bahut yaad aaya

chaak-e-daman jo abhi main ne siya pahli bar