mahw kar Dalegi ek din husn ki shohrat mujhe

mahv kar Dālegī ik din husn kī shohrat mujhe

ġhair tujh ko dekhte haiñ hotī hai hairat mujhe

ishq kī rāheñ haiñ tai karnī kisī sūrat mujhe

manzileñ dushvār haiñ allāh de himmat mujhe

hashr ke din bhī gunāhoñ se na hūñgā sharmsār

muñh chhupāne ko milegā dāman-e-rahmat mujhe

maiñ pas-e-dīvār baiThā huuñ sukūn-e-qalb se

jiite jī duniyā meñ goyā mil ga.ī jannat mujhe

koī rahnā chāhiye dast-e-junūñ kā mashġhala

le to aa.ī hai bayābāñ meñ mirī vahshat mujhe

zindagī to kāvishoñ meñ hī kaTī apnī 'shamīm'

qabr meñ le jā.egī ab ḳhvāhish-e-rāhat mujhe

mahw kar Dalegi ek din husn ki shohrat mujhe

ghair tujh ko dekhte hain hoti hai hairat mujhe

ishq ki rahen hain tai karni kisi surat mujhe

manzilen dushwar hain allah de himmat mujhe

hashr ke din bhi gunahon se na hunga sharmsar

munh chhupane ko milega daman-e-rahmat mujhe

main pas-e-diwar baiTha hun sukun-e-qalb se

jite ji duniya mein goya mil gai jannat mujhe

koi rahna chahiye dast-e-junun ka mashghala

le to aai hai bayaban mein meri wahshat mujhe

zindagi to kawishon mein hi kaTi apni 'shamim'

qabr mein le jaegi ab KHwahish-e-rahat mujhe