mai bhi hai saghar bhi hai saqi bhi paimana bhi hai

mai bhī hai sāġhar bhī hai saaqī bhī paimāna bhī hai

dekhnā ye hai ki ham meñ zauq-e-rindāna bhī hai

raqs-e-parvāna bhī dekh ai chashm-e-ibrat ye bhī dekh

sham.a kī āġhosh meñ kuchh ḳhāk-e-parvāna bhī hai

ham ne maanā hai sukūñ dāmān-e-sāhil meñ magar

fitrat-e-ahl-e-junūñ tūfāñ se Takrānā bhī hai

ai talabgār-e-masarrat ye bhī sochā hai kabhī

ik masarrat apne dil ko ġham se bahlānā bhī hai

jis ne jo chāhā use samjhā kiyā ai ham-nashīñ

zindagānī ik haqīqat bhī hai afsāna bhī hai

ahl-e-dil ke vāste hai bahr-e-aish-o-imbisāt

go ba-zāhir bazm-e-hastī ek ġham-ḳhāna bhī hai

do ghaḌī ai gardish-e-ayyām bas ruk jā yahīñ

sāqī-e-rā.anā bhī hai gardish meñ paimāna bhī hai

jalva-ārā zarre zarre meñ hai nūr-e-barq-e-tūr

lekin ai 'sābir' kahīñ zauq-e-kalīmāna bhī hai

mai bhi hai saghar bhi hai saqi bhi paimana bhi hai

dekhna ye hai ki hum mein zauq-e-rindana bhi hai

raqs-e-parwana bhi dekh ai chashm-e-ibrat ye bhi dekh

shama ki aaghosh mein kuchh KHak-e-parwana bhi hai

hum ne mana hai sukun daman-e-sahil mein magar

fitrat-e-ahl-e-junun tufan se Takrana bhi hai

ai talabgar-e-masarrat ye bhi socha hai kabhi

ek masarrat apne dil ko gham se bahlana bhi hai

jis ne jo chaha use samjha kiya ai ham-nashin

zindagani ek haqiqat bhi hai afsana bhi hai

ahl-e-dil ke waste hai bahr-e-aish-o-imbisat

go ba-zahir bazm-e-hasti ek gham-KHana bhi hai

do ghaDi ai gardish-e-ayyam bas ruk ja yahin

saqi-e-raana bhi hai gardish mein paimana bhi hai

jalwa-ara zarre zarre mein hai nur-e-barq-e-tur

lekin ai 'sabir' kahin zauq-e-kalimana bhi hai