مے کا مشتاق ہے دل آنکھ کا سودائی ہے

مے کا مشتاق ہے دل آنکھ کا سودائی ہے

جذبۂ شوق بہ اندازۂ رعنائی ہے

انجمن میں بھی کسی انجمن آرا کے بغیر

دل سے تا حد نظر عالم تنہائی ہے

شہر گل انجمن ماہ وشاں کوۓ مغاں

دل کہیں بھی ہو مگر تیرا تمنائی ہے

جب بھی ہم ابتریٔ حال سے مایوس ہوئے

زیست ماضی کی حسیں یاد اٹھا لائی ہے

رنگ پہ دم سے ہے پروانوں کے سارا ماحول

شمع کو واہمۂ انجمن آرائی ہے

شہر میں رہ کے یہ احساس ہوا ہے کہ خوشی

دور دیہات میں بجتی ہوئی شہنائی ہے

ہائے وہ حسن کہ چڑھتی ہوئی کرنوں کی اڑان

آہ یہ شوق کہ ٹوٹی ہوئی انگڑائی ہے

آنسوؤں سے کیا سیراب دلوں کو شوکتؔ

نہر نکلی ہے تو اس تھل میں بہار آئی ہے