mai ka mushtaq hai dil aankh ka saudai hai

mai kā mushtāq hai dil aañkh kā saudā.ī hai

jazba-e-shauq ba-andāza-e-ra.anā.ī hai

anjuman meñ bhī kisī anjuman-ārā ke baġhair

dil se tā-hadd-e-nazar ālam-e-tanhā.ī hai

shahr-e-gul anjuman-e-māh-vashāñ kū-e-muġhāñ

dil kahīñ bhī ho magar terā tamannā.ī hai

jab bhī ham abtarī-e-hāl se māyūs hue

ziist maazī kī hasīñ yaad uThā laa.ī hai

rang pe dam se hai parvānoñ ke saarā māhaul

sham' ko vāhima-e-anjuman-ārā.ī hai

shahr meñ rah ke ye ehsās huā hai ki ḳhushī

duur dehāt meñ bajtī huī shahnā.ī hai

haa.e vo husn ki chaḌhtī huī kirnoñ kī uḌaan

aah ye shauq ki TuuTī huī añgḌā.ī hai

āñsuoñ se kiyā sairāb diloñ ko 'shaukat'

nahr niklī hai to is thal meñ bahār aa.ī hai

mai ka mushtaq hai dil aankh ka saudai hai

jazba-e-shauq ba-andaza-e-ranai hai

anjuman mein bhi kisi anjuman-ara ke baghair

dil se ta-hadd-e-nazar aalam-e-tanhai hai

shahr-e-gul anjuman-e-mah-washan ku-e-mughan

dil kahin bhi ho magar tera tamannai hai

jab bhi hum abtari-e-haal se mayus hue

zist mazi ki hasin yaad uTha lai hai

rang pe dam se hai parwanon ke sara mahaul

sham' ko wahima-e-anjuman-arai hai

shahr mein rah ke ye ehsas hua hai ki KHushi

dur dehat mein bajti hui shahnai hai

hae wo husn ki chaDhti hui kirnon ki uDan

aah ye shauq ki TuTi hui angDai hai

aansuon se kiya sairab dilon ko 'shaukat'

nahr nikli hai to is thal mein bahaar aai hai