میکدے جانے کی ہمت بھی نہیں کر سکتے

میکدے جانے کی ہمت بھی نہیں کر سکتے

ہم کبھی ایسی حماقت بھی نہیں کر سکتے

اپنی غلطی کو جو تسلیم نہیں کرتے ہم

ایسے لوگوں کو نصیحت بھی نہیں کر سکتے

ہم جہاں جا کے چلے آئیں سلامت واپس

تم کبھی اتنی جسارت بھی نہیں کر سکتے

زندگی نے ہمیں اس موڑ پہ لا کے چھوڑا

تم سے ہم کھل کے محبت بھی نہیں کر سکتے

اس نے جاتے ہوئے سونپی ہے ہمیں وہ دولت

اس میں ہم کوئی خیانت بھی نہیں کر سکتے

اتنا الجھا دیا حالات نے لوگوں کو یہاں

ایک دوجے کی حفاظت بھی نہیں کر سکتے

وقت نے کر دیا احمدؔ ہمیں مصروف بہت

بیٹھ کر ساتھ ضیافت بھی نہیں کر سکتے