mai-kade ke bujh gae sare charagh

mai-kade ke bujh ga.e saare charāġh

karb-e-jāñ-sozī se dil haare charāġh

merī palkoñ par jale the jo kabhī

ban ga.e vo arsh ke taare charāġh

dard se kuchh is tarah simTī hai lau

aah bhar kar chup haiñ bechāre charāġh

maiñ vo rahrav huuñ ki jis kī raah meñ

tīrgī ne har qadam vaare charāġh

'baḳht' zarf-e-anjuman par raat bhar

TimTimā.e dard ke maare charāġh

mai-kade ke bujh gae sare charagh

karb-e-jaan-sozi se dil haare charagh

meri palkon par jale the jo kabhi

ban gae wo arsh ke tare charagh

dard se kuchh is tarah simTi hai lau

aah bhar kar chup hain bechaare charagh

main wo rahraw hun ki jis ki rah mein

tirgi ne har qadam ware charagh

'baKHt' zarf-e-anjuman par raat bhar

TimTimae dard ke mare charagh