mai-kade ki shart daur-e-baada-o-saghar ki qaid

mai-kade kī shart daur-e-bāda-o-sāġhar kī qaid

ek merī tishnagī aur us pe duniyā bhar kī qaid

ishq meñ sahrā-navardī kā bahāna chāhiye

vahshat-e-dil ke liye achchhī nahīñ hai ghar kī qaid

māvarā-e-arsh hai mere taḳhayyul kī uḌaan

harf-e-be-ma.anī samajhtā huuñ maiñ bāl-o-par kī qaid

dā.ī-e-soz-e-jigar ho kyoñ na parvāne kī ḳhaak

sham-e-mahfil ke liye hai mom ke paikar kī qaid

zindagī kā mā-hasal hai iztirāb-e-zindagī

jāda-e-ulfat meñ lāzim hai dil-e-muztar kī qaid

aadmī kī ḳhvāb-gāheñ haiñ salīb-o-teġh bhī

niiñd se be-tāb āñkhoñ ko nahīñ bistar kī qaid

kyā jahān-e-rang-o-nik.hat kī qasam kaafī na thī

kyoñ pa.e-saugand rakhī tum ne apne sar kī qaid

vaqt ke sail-e-ravāñ ke sāmne kuchh bhī nahīñ

bādbān-e-azm kī bandish ho yā langar kī qaid

sar-ba-sajda jab kabhī zauq-e-jabīñ-sā.ī huā

jazb-e-ulfat ne lagā dī us ke sang-e-dar kī qaid

kyā kisī dariyā kī lahreñ gin nahīñ saktā thā maiñ

ḳhvāb meñ rakkhī ga.ī kyoñ ret ke manzar kī qaid

merī nazroñ meñ mohabbat vo ibādat hai 'sabā'

jis ibādat meñ nahīñ hai phuul aur patthar kī qaid

mai-kade ki shart daur-e-baada-o-saghar ki qaid

ek meri tishnagi aur us pe duniya bhar ki qaid

ishq mein sahra-nawardi ka bahana chahiye

wahshat-e-dil ke liye achchhi nahin hai ghar ki qaid

mawara-e-arsh hai mere taKHayyul ki uDan

harf-e-be-mani samajhta hun main baal-o-par ki qaid

dai-e-soz-e-jigar ho kyon na parwane ki KHak

sham-e-mahfil ke liye hai mom ke paikar ki qaid

zindagi ka ma-hasal hai iztirab-e-zindagi

jada-e-ulfat mein lazim hai dil-e-muztar ki qaid

aadmi ki KHwab-gahen hain salib-o-tegh bhi

nind se be-tab aankhon ko nahin bistar ki qaid

kya jahan-e-rang-o-nikhat ki qasam kafi na thi

kyon pae-saugand rakhi tum ne apne sar ki qaid

waqt ke sail-e-rawan ke samne kuchh bhi nahin

baadban-e-azm ki bandish ho ya langar ki qaid

sar-ba-sajda jab kabhi zauq-e-jabin-sai hua

jazb-e-ulfat ne laga di us ke sang-e-dar ki qaid

kya kisi dariya ki lahren gin nahin sakta tha main

KHwab mein rakkhi gai kyon ret ke manzar ki qaid

meri nazron mein mohabbat wo ibaadat hai 'saba'

jis ibaadat mein nahin hai phul aur patthar ki qaid