مے کشی کا تو مزہ جب ہے بہار آئی ہو

مے کشی کا تو مزہ جب ہے بہار آئی ہو

موج بادہ مرے ساقی تری انگڑائی ہو

گامزن جب کہ ادھر آپ کا سودائی ہو

کس لیے پھر نہ بیاباں میں بہار آئی ہو

اس طرح پہلے ملا تھا نہ مجھے کوئی شخص

جیسے برسوں سے مری اس کی شناسائی ہو

اس کے نزدیک ہے کیا چیز تماشائے ہلال

جس کی نظروں میں نہاں آپ کی انگڑائی ہو

گفتگو آپ کی میری ہے ابھی جائے تمام

غیر ممکن کہ سر حشر یہ تنہائی ہو

سنگ در ہی نہ رہے یا نہ رہے میری جبیں

کچھ نہ کچھ حاصل دل ذوق جبیں سائی ہو

اس کا اعزاز کوئی اہل نظر سے پوچھے

جس نے قدموں میں ترے آ کے جگہ پائی ہو

ایک مدت سے گرفتار قفس میں ہو ضیاؔ

جانے کے بار گلستاں میں بہار آئی ہو