mai-kashi ka to maza jab hai bahaar aai ho

mai-kashī kā to maza jab hai bahār aa.ī ho

mauj-e-bāda mire saaqī tirī añgḌā.ī ho

gāmzan jab ki udhar aap kā saudā.ī ho

kis liye phir na bayābāñ meñ bahār aa.ī ho

is tarah pahle milā thā na mujhe koī shaḳhs

jaise barsoñ se mirī us kī shanāsā.ī ho

us ke nazdīk hai kyā chiiz tamāshā-e-hilāl

jis kī nazroñ meñ nihāñ aap kī añgḌā.ī ho

guftugū aap kī merī hai abhī jā-e-tamām

ġhair-mumkin ki sar-e-hashr ye tanhā.ī ho

sang-e-dar hī na rahe yā na rahe merī jabīñ

kuchh na kuchh hāsil-e-dil zauq-e-jabīñ-sā.ī ho

us kā e.azāz koī ahl-e-nazar se pūchhe

jis ne qadmoñ meñ tire aa ke jagah paa.ī ho

ek muddat se giraftār qafas meñ ho 'ziyā'

jaane kai baar gulistāñ meñ bahār aa.ī ho

mai-kashi ka to maza jab hai bahaar aai ho

mauj-e-baada mere saqi teri angDai ho

gamzan jab ki udhar aap ka saudai ho

kis liye phir na bayaban mein bahaar aai ho

is tarah pahle mila tha na mujhe koi shaKHs

jaise barson se meri us ki shanasai ho

us ke nazdik hai kya chiz tamasha-e-hilal

jis ki nazron mein nihan aap ki angDai ho

guftugu aap ki meri hai abhi ja-e-tamam

ghair-mumkin ki sar-e-hashr ye tanhai ho

sang-e-dar hi na rahe ya na rahe meri jabin

kuchh na kuchh hasil-e-dil zauq-e-jabin-sai ho

us ka eazaz koi ahl-e-nazar se puchhe

jis ne qadmon mein tere aa ke jagah pai ho

ek muddat se giraftar qafas mein ho 'ziya'

jaane kai bar gulistan mein bahaar aai ho