mai-KHana-e-hayat ka anjam de gaya

mai-ḳhāna-e-hayāt kā anjām de gayā

vo mujh ko ek TuuTā huā jaam de gayā

vo fikr-o-fan ko jazba-e-be-nām de gayā

ġhazloñ ko merī paikar-e-ib.hām de gayā

aayā thā saath le ke vo sauġhāt hijr kī

ruḳhsat huā to tohfa-e-auhām de gayā

zāhir hue na chehre se dil ke ta.assurāt

ḳhabroñ pe tabsira bhī bahut kaam de gayā

sahbā shabāb qaus-o-quzah raushnī gulāb

har shaḳhs tujh ko ek nayā naam de gayā

duniyā kī nafsiyāt samā meñ na aa sakī

har aadmī hayāt ko ilzām de gayā

mai-KHana-e-hayat ka anjam de gaya

wo mujh ko ek TuTa hua jam de gaya

wo fikr-o-fan ko jazba-e-be-nam de gaya

ghazlon ko meri paikar-e-ibham de gaya

aaya tha sath le ke wo saughat hijr ki

ruKHsat hua to tohfa-e-auham de gaya

zahir hue na chehre se dil ke tassuraat

KHabron pe tabsira bhi bahut kaam de gaya

sahba shabab qaus-o-quzah raushni gulab

har shaKHs tujh ko ek naya nam de gaya

duniya ki nafsiyat sama mein na aa saki

har aadmi hayat ko ilzam de gaya