میداں بھی ایک جیسا اور گھر بھی ایک جیسا

میداں بھی ایک جیسا اور گھر بھی ایک جیسا

اک سائباں فلک کا سر پر بھی ایک جیسا

دنیا ہے خوب صورت میرے لئے یہاں پر

سایہ بھی ایک جیسا پیکر بھی ایک جیسا

انداز نفرتوں کا بدلا نہیں ابھی تک

جنگیں بھی ایک جیسی لشکر بھی ایک جیسا

صحرا کی ریت ہو یا سبزہ ہو وادیوں کا

نیندیں بھی ایک جیسی بستر بھی ایک جیسا

ظاہر میں مختلف ہیں لیکن بوقت طوفاں

پانی بھی ایک جیسا پتھر بھی ایک جیسا

اپنی جگہ ہے تازہ صدیوں سے میرا چہرا

اول بھی ایک جیسا آخر بھی ایک جیسا

میرا وجود شاہدؔ شبنم کا ایک خطرہ

باہر بھی ایک جیسا اندر بھی ایک جیسا