raqs karta hun jam pita hun

raqs kartā huuñ jaam piitā huuñ

aam miltī hai aam piitā huuñ

jhuuT maiñ ne kabhī nahīñ bolā

zāhidān-e-kirām piitā huuñ

ruḳh hai pur-nūr to ta.ajjub kyā

bāda-e-lāla-fām piitā huuñ

itnī tezī bhī kyā pilāne meñ

ābgīne ko thaam piitā huuñ

kaam bhī ik namāz hai merī

ḳhatm karte hī kaam piitā huuñ

tere hāthoñ se kis ko miltī hai?

mere māh-e-tamām piitā huuñ

zindagī kā safar hī aisā hai

dam-ba-dam gaam gaam piitā huuñ

mujh ko mai se baḌī mohabbat hai

maiñ ba-sad-ehtirām piitā huuñ

mai mire hoñT chuum letī hai

le ke jab terā naam piitā huuñ

shaiḳh o muftī 'adam' jab aa jaa.eñ

ban ke un kā imaam piitā huuñ

raqs karta hun jam pita hun

aam milti hai aam pita hun

jhuT main ne kabhi nahin bola

zahidan-e-kiram pita hun

ruKH hai pur-nur to tajjub kya

baada-e-lala-fam pita hun

itni tezi bhi kya pilane mein

aabgine ko tham pita hun

kaam bhi ek namaz hai meri

KHatm karte hi kaam pita hun

tere hathon se kis ko milti hai?

mere mah-e-tamam pita hun

zindagi ka safar hi aisa hai

dam-ba-dam gam gam pita hun

mujh ko mai se baDi mohabbat hai

main ba-sad-ehtiram pita hun

mai mere honT chum leti hai

le ke jab tera nam pita hun

shaiKH o mufti 'adam' jab aa jaen

ban ke un ka imam pita hun