maiKHane ke dar par jo laTka nazar aata hai

maiḳhāne ke dar par jo laTkā nazar aatā hai

ye shaiḳh-e-haram hī kā kurtā nazar aatā hai

powder hai ki chehre par aaTā nazar aatā hai

mahbūb-e-ḳhud-ārā to baniyā nazar aatā hai

laḌkā nazar aatī hai laḌkī nazar aatā hai

maġhrib kā jo sīdhā hai ulTā nazar aatā hai

malmal kā amāma to london meñ nahīñ miltā

ai shaiḳh tire sar par Dhāka nazar aatā hai

ġhā.eb haiñ namāzī bhī ġhā.eb hai vo mullā bhī

masjid meñ musalle par loTā nazar aatā hai

āshiq ke janāze par duniyā hī chalī aa.ī

kaalā nazar aatā hai gorā nazar aatā hai

vaa.iz ne kaTā Daalī maiḳhāne meñ phir bole

kyā chor kī dāḌhī meñ tinkā nazar aatā hai

maiKHane ke dar par jo laTka nazar aata hai

ye shaiKH-e-haram hi ka kurta nazar aata hai

powder hai ki chehre par aaTa nazar aata hai

mahbub-e-KHud-ara to baniya nazar aata hai

laDka nazar aati hai laDki nazar aata hai

maghrib ka jo sidha hai ulTa nazar aata hai

malmal ka amama to london mein nahin milta

ai shaiKH tere sar par Dhaka nazar aata hai

ghaeb hain namazi bhi ghaeb hai wo mulla bhi

masjid mein musalle par loTa nazar aata hai

aashiq ke janaze par duniya hi chali aai

kala nazar aata hai gora nazar aata hai

waiz ne kaTa Dali maiKHane mein phir bole

kya chor ki daDhi mein tinka nazar aata hai