maiKHane mein ulfat ke nigahban bahut hain

maiḳhāne meñ ulfat ke nigahbān bahut haiñ

is chhoTī sī bastī meñ bhī insān bahut haiñ

ḳhud apnī tabāhī kā hameñ ranj nahīñ hai

tauhīn-e-mohabbat se pareshān bahut haiñ

aaj un ko huā hai ġhalat ehsās kā ehsās

ā.īna jo dekhā hai to hairān bahut haiñ

maiḳhāne meñ roz aane kī kyoñ kartā hai zahmat

zāhid tirī tablīġh ke maidān bahut haiñ

āgāh nahīñ hañsne ke anjām se shāyad

vo phuul jinheñ hañsne ke armān bahut haiñ

maġhmūm na ho tang-nigāhī-e-jahāñ se

bilqīs-e-adab tere sulaimān bahut haiñ

sāhil pe pahuñchne kī kare kaun tamanna

dariyā meñ safīne ke nigahbān bahut haiñ

bijlī kī sifat sho.ala-fishānī hī nahīñ hai

bijlī kī amaañ meñ bhī gulistān bahut haiñ

ai gesū-e-shab-rang hameñ bhī to amaañ de

ham ko bhī tirī chhāñv ke armān bahut haiñ

ham ne to ye samjhā hai 'nihāl' ab bhī ġhazal ko

kahne kā salīqa ho to unvān bahut haiñ

maiKHane mein ulfat ke nigahban bahut hain

is chhoTi si basti mein bhi insan bahut hain

KHud apni tabahi ka hamein ranj nahin hai

tauhin-e-mohabbat se pareshan bahut hain

aaj un ko hua hai ghalat ehsas ka ehsas

aaina jo dekha hai to hairan bahut hain

maiKHane mein roz aane ki kyon karta hai zahmat

zahid teri tabligh ke maidan bahut hain

aagah nahin hansne ke anjam se shayad

wo phul jinhen hansne ke arman bahut hain

maghmum na ho tang-nigahi-e-jahan se

bilqis-e-adab tere sulaiman bahut hain

sahil pe pahunchne ki kare kaun tamanna

dariya mein safine ke nigahban bahut hain

bijli ki sifat shoala-fishani hi nahin hai

bijli ki aman mein bhi gulistan bahut hain

ai gesu-e-shab-rang hamein bhi to aman de

hum ko bhi teri chhanw ke arman bahut hain

hum ne to ye samjha hai 'nihaal' ab bhi ghazal ko

kahne ka saliqa ho to unwan bahut hain