میں آفتاب کو دیکھوں کہ چاندنی سے ملوں

میں آفتاب کو دیکھوں کہ چاندنی سے ملوں

میں زیست کاٹ چکی اب تو زندگی سے ملوں

ہیں کتنے مصرعے ابھی زیر تربیت مجھ میں

میں لفظ لفظ تراشوں تو شاعری سے ملوں

میں اپنی زیست میں اتروں کمال ہستی تک

میں اپنے دل سے ملوں دل کی بے دلی سے ملوں

ہو خوشبوؤں سے معطر بدن کا ہر گوشہ

وہ جس دیار سے گزرا ہے اس گلی سے ملوں

سمندروں سے کروں دوستی کہ صحرا سے

لبوں کو خشک کروں اور تشنگی سے ملوں

نبی کے عشق میں دیوانگی کے عالم تک

علی سے عشق کروں اور کسی ولی سے ملوں

میں دشمنی کا ہر اک جز سمجھ گئی سپناؔ

کتاب دوستی لکھ دوں میں دشمنی سے ملوں