main aaftab ko dekhun ki chandni se milun

maiñ āftāb ko dekhūñ ki chāñdnī se milūñ

maiñ ziist kaaT chukī ab to zindagī se milūñ

haiñ kitne misre abhī zer-e-tarbiyat mujh meñ

maiñ lafz lafz tarāshūñ to shā'irī se milūñ

maiñ apnī ziist meñ utrūñ kamāl-e-hastī tak

maiñ apne dil se milūñ dil kī be-dilī se milūñ

ho ḳhushbuoñ se mo'attar badan kā har gosha

vo jis dayār se guzrā hai us galī se milūñ

samundaroñ se karūñ dostī ki sahrā se

laboñ ko ḳhushk karūñ aur tishnagī se milūñ

nabī ke 'ishq meñ dīvāngī ke 'ālam tak

'alī se 'ishq karūñ aur kisī valī se milūñ

maiñ dushmanī kā har ik juz samajh ga.ī 'sapnā'

kitāb-e-dostī likh duuñ maiñ dushmanī se milūñ

main aaftab ko dekhun ki chandni se milun

main zist kaT chuki ab to zindagi se milun

hain kitne misre abhi zer-e-tarbiyat mujh mein

main lafz lafz tarashun to sha'iri se milun

main apni zist mein utrun kamal-e-hasti tak

main apne dil se milun dil ki be-dili se milun

ho KHushbuon se mo'attar badan ka har gosha

wo jis dayar se guzra hai us gali se milun

samundaron se karun dosti ki sahra se

labon ko KHushk karun aur tishnagi se milun

nabi ke 'ishq mein diwangi ke 'alam tak

'ali se 'ishq karun aur kisi wali se milun

main dushmani ka har ek juz samajh gai 'sapna'

kitab-e-dosti likh dun main dushmani se milun