main ahl-e-zar bhi nahin ahl-e-saltanat bhi nahin

maiñ ahl-e-zar bhī nahīñ ahl-e-saltanat bhī nahīñ

so merā koī ḳhabar-gīr-e-ḳhairiyat bhī nahīñ

zamīn kyoñ mujhe chashm-e-hasad se dekhtī hai

agarche maiñ koī shaḳhs-e-falak-sifat bhī nahīñ

kisī ne phir mire jazboñ kā aaj ḳhuun kiyā

baḌā ajiib huuñ maiñ tālib-e-diyat bhī nahīñ

ai saada lauh tū yaañ kāmyāb na.iiñ hogā

tire vajūd meñ thoḌī munāfiqat bhī nahīñ

mujhe kisī kī zarūrat nahīñ shumārish ko

ki āstīn ke ye saañp anginat bhī nahīñ

vo dars dene lagā hai ḳhudā-shanāsī kā

ḳhudā to duur jise apnī ma.arifat bhī nahīñ

parā.e des meñ aa kar panāh lī maiñ ne

ki mere des meñ thoḌī sī amniyat bhī nahīñ

yaqīn kaise karūñ ḳhat ye tū ne bhejā hai

ki is pe muhr bhī aur terā dastaḳhat bhī nahīñ

ḳhud us ke bachche bhī karte nahīñ salām use

ġharīb baap kī ab itnī haisiyat bhī nahīñ

maiñ kaise maan luuñ ye terā aks hai jānam

ki us kī tujh se zarā sī mushābahat bhī nahīñ

hamāre jiite jī ġhairoñ se rasm-o-rāh na rakh

hamāre dil meñ ye ġham Dhone kī sakat bhī nahīñ

hamesha us ko manāne meñ pahl karte ho

so us kā yūñhī ḳhafā honā kuchh ġhalat bhī nahīñ

luTā chukā huuñ maiñ sab kuchh rah-e-mohabbat meñ

ki farsh paañv tale aur sar pe chhat bhī nahīñ

mirī likhī huiiñ ġhazleñ paḌhe to kaun paḌhe

ab is qadar bhī hasīñ 'nūrī' kī likhat bhī nahīñ

main ahl-e-zar bhi nahin ahl-e-saltanat bhi nahin

so mera koi KHabar-gir-e-KHairiyat bhi nahin

zamin kyon mujhe chashm-e-hasad se dekhti hai

agarche main koi shaKHs-e-falak-sifat bhi nahin

kisi ne phir mere jazbon ka aaj KHun kiya

baDa ajib hun main talib-e-diyat bhi nahin

ai sada lauh tu yan kaamyab nain hoga

tere wajud mein thoDi munafiqat bhi nahin

mujhe kisi ki zarurat nahin shumarish ko

ki aastin ke ye sanp anginat bhi nahin

wo dars dene laga hai KHuda-shanasi ka

KHuda to dur jise apni marifat bhi nahin

parae des mein aa kar panah li main ne

ki mere des mein thoDi si amniyat bhi nahin

yaqin kaise karun KHat ye tu ne bheja hai

ki is pe muhr bhi aur tera dastaKHat bhi nahin

KHud us ke bachche bhi karte nahin salam use

gharib bap ki ab itni haisiyat bhi nahin

main kaise man lun ye tera aks hai jaanam

ki us ki tujh se zara si mushabahat bhi nahin

hamare jite ji ghairon se rasm-o-rah na rakh

hamare dil mein ye gham Dhone ki sakat bhi nahin

hamesha us ko manane mein pahl karte ho

so us ka yunhi KHafa hona kuchh ghalat bhi nahin

luTa chuka hun main sab kuchh rah-e-mohabbat mein

ki farsh panw tale aur sar pe chhat bhi nahin

meri likhi huin ghazlen paDhe to kaun paDhe

ab is qadar bhi hasin 'nuri' ki likhat bhi nahin