میں ایسے چپ جو کھڑا ہوا ہوں مرے عزیزو

میں ایسے چپ جو کھڑا ہوا ہوں مرے عزیزو

خفا ہوں خود سے لڑا ہوا ہوں مرے عزیزو

فلک پہ اڑنے کی آرزو کا یہی صلہ ہے

زمیں پہ مردہ پڑا ہوا ہوں مرے عزیزو

اسی لیے تو مرے سخن میں یہ تیکھا پن ہے

میں حاسدوں میں بڑا ہوا ہوں مرے عزیزو

سسکتے لوگوں بلکتی روحوں کو دیکھتا ہوں

میں پھر بھی بے حس کھڑا ہوا ہوں مرے عزیزو

مجھے بتاتے ہو موسموں کا بدلنا کیا ہے

بہار رت میں جھڑا ہوا ہوں مرے عزیزو

کہانی کب کی میں پوری کر کے سنا بھی دیتا

کسی جگہ پر اڑا ہوا ہوں مرے عزیزو

میں کون ہوں کس طرح کا ہوں یہ انہی سے پوچھو

کہ جن دلوں میں گڑا ہوا ہوں مرے عزیزو