main aksar rah chalte sochta hun

maiñ aksar raah chalte sochtā huuñ

maiñ āḳhir ye safar kyoñ kar rahā huuñ

zamāna aa rahā hai jā rahā hai

magar maiñ raah meñ tanhā khaḌā huuñ

koī aa.e mujhe bāhar nikāle

maiñ apne aap se tang aa chukā huuñ

ye saayā thā na saa.e kā gumāñ thā

maiñ jaltī ret par sadiyoñ chalā huuñ

tumhārā naam jab aatā hai lab par

maiñ pattoñ kī tarah se kāñptā huuñ

mire dam se hai sadiyoñ kā tasalsul

magar maiñ kis qadar TuuTā huā huuñ

hisār-e-jism se huuñ mutma.in ab

maiñ zanjīreñ bahut kam toḌtā huuñ

main aksar rah chalte sochta hun

main aaKHir ye safar kyon kar raha hun

zamana aa raha hai ja raha hai

magar main rah mein tanha khaDa hun

koi aae mujhe bahar nikale

main apne aap se tang aa chuka hun

ye saya tha na sae ka guman tha

main jalti ret par sadiyon chala hun

tumhaara nam jab aata hai lab par

main patton ki tarah se kanpta hun

mere dam se hai sadiyon ka tasalsul

magar main kis qadar TuTa hua hun

hisar-e-jism se hun mutmain ab

main zanjiren bahut kam toDta hun