main apna ishq zaban se bayan karun bhi nahin

maiñ apnā 'ishq zabāñ se bayāñ karūñ bhī nahīñ

nazar se aap kī lekin chhupā sakūñ bhī nahīñ

tire ġhalat ko ġhalat tak na kah sakūñ vā'iz

qasam ḳhudā kī maiñ itnā sharīf huuñ bhī nahīñ

jo terī yaad ko ro ro ke nazr kar dete

hamārī aañkh meñ afsos itnā ḳhuuñ bhī nahīñ

ye kaise moḌ pe le aa.ī zindagī mujh ko

ki jī sakūñ bhī nahīñ aur mar sakūñ bhī nahīñ

tire qarīb hī vahshat-zada sā rahtā huuñ

tire baġhair mirī jaañ mujhe sukūñ bhī nahīñ

tumhāre baa'd tumhārī qasam tumhārī tarah

kisī ko chāhte rahne kā ab junūñ bhī nahīñ

agar hai 'ishq pe tohmat faqat numā.ish kī

to chashm-e-nāz meñ pahle sā vo fusūñ bhī nahīñ

kabhī kabhī hī sahī shā'irī ke parde meñ

maiñ apne ġham ko zamāne se kyā kahūñ bhī nahīñ

main apna 'ishq zaban se bayan karun bhi nahin

nazar se aap ki lekin chhupa sakun bhi nahin

tere ghalat ko ghalat tak na kah sakun wa'iz

qasam KHuda ki main itna sharif hun bhi nahin

jo teri yaad ko ro ro ke nazr kar dete

hamari aankh mein afsos itna KHun bhi nahin

ye kaise moD pe le aai zindagi mujh ko

ki ji sakun bhi nahin aur mar sakun bhi nahin

tere qarib hi wahshat-zada sa rahta hun

tere baghair meri jaan mujhe sukun bhi nahin

tumhaare ba'd tumhaari qasam tumhaari tarah

kisi ko chahte rahne ka ab junun bhi nahin

agar hai 'ishq pe tohmat faqat numaish ki

to chashm-e-naz mein pahle sa wo fusun bhi nahin

kabhi kabhi hi sahi sha'iri ke parde mein

main apne gham ko zamane se kya kahun bhi nahin