main apne dast par shab KHwab mein dekha ki aKHgar tha

maiñ apne dast par shab ḳhvāb meñ dekhā ki aḳhgar thā

sahar ko khul ga.ī jab aañkh merā haath dil par thā

na thī tā-sub.h kuchh hājat charāg o sham.a o mish.al kī

hamārī bazm meñ shab jalva-gar vo māh-e-paikar thā

tirī ik jumbish-e-abrū se aalam ho gayā zaa.e

nazar kar jis taraf dekhā to jo dhaḌ thā so be-sar thā

tū is raftār o qad se jis taraf guzrā mire sāhib

tire faiz-e-qadam se har qadam sarv o sanobar thā

na thī parvāz kī tāqat sar-e-dīvār-e-gulshan tak

ki jo taa.ir thā so sayyād ke hāthoñ se be-par thā

chalā jaatā thā 'hātim' aaj kuchh vāhī-tabāhī sā

jo dekhā haath meñ us ke tire shikve kā daftar thā

main apne dast par shab KHwab mein dekha ki aKHgar tha

sahar ko khul gai jab aankh mera hath dil par tha

na thi ta-subh kuchh hajat charag o shama o mishal ki

hamari bazm mein shab jalwa-gar wo mah-e-paikar tha

teri ek jumbish-e-abru se aalam ho gaya zae

nazar kar jis taraf dekha to jo dhaD tha so be-sar tha

tu is raftar o qad se jis taraf guzra mere sahib

tere faiz-e-qadam se har qadam sarw o sanobar tha

na thi parwaz ki taqat sar-e-diwar-e-gulshan tak

ki jo tair tha so sayyaad ke hathon se be-par tha

chala jata tha 'hatim' aaj kuchh wahi-tabahi sa

jo dekha hath mein us ke tere shikwe ka daftar tha