main apne dil mein nai KHwahishen sajae hue

maiñ apne dil meñ na.ī ḳhvāhisheñ sajā.e hue

khaḌā huā huuñ havā meñ qadam jamā.e hue

na.e jahāñ kī tamannā meñ ghar se niklā huuñ

hatheliyoñ pe na.ī mish.aleñ jalā.e hue

havā ke phuul mahakne lage mujhe pā kar

maiñ pahlī baar hañsā zaḳhm ko chhupā.e hue

na āñdhiyāñ haiñ na tūfāñ na ḳhuun ke sailāb

haiñ ḳhushbuoñ meñ manāzir sabhī nahā.e hue

pighal ga.ī haiñ achānak ġhamoñ kī zanjīreñ

gire haiñ dhuup ke neze badan churā.e hue

dikhā rahī hai na.ī zindagī ke naqsh-e-qadam

sukūñ kī niiñd gale se mujhe lagā.e hue

chaTaḳhne vaalī zamīñ duur rah ga.ī 'afzal'

haiñ saare khet sitāroñ ke lahlahā.e hue

main apne dil mein nai KHwahishen sajae hue

khaDa hua hun hawa mein qadam jamae hue

nae jahan ki tamanna mein ghar se nikla hun

hatheliyon pe nai mishalen jalae hue

hawa ke phul mahakne lage mujhe pa kar

main pahli bar hansa zaKHm ko chhupae hue

na aandhiyan hain na tufan na KHun ke sailab

hain KHushbuon mein manazir sabhi nahae hue

pighal gai hain achanak ghamon ki zanjiren

gire hain dhup ke neze badan churae hue

dikha rahi hai nai zindagi ke naqsh-e-qadam

sukun ki nind gale se mujhe lagae hue

chaTaKHne wali zamin dur rah gai 'afzal'

hain sare khet sitaron ke lahlahae hue