main apne ishq ko KHush-e-ehtimam karta hua

maiñ apne ishq ko ḳhush-e-ehtimām kartā huā

maqām-e-shukr pe pahuñchā kalām kartā huā

ye gard-bād salāmat guzarnā chāhtā hai

mire charāġh pe vahshat tamām kartā huā

guzar rahā huuñ kisī qariya-e-malāmat se

qadīm silsila-dārī ko aam kartā huā

to phir ye kaun hai nisfunnahār ke hañgām

qayām o raqs kī hālat meñ shaam kartā huā

kabhī to khul ke batā ai mirī riyāzat-e-marg

maiñ kaisā lagtā huuñ fikr-e-davām kartā huā

zamānoñ ba.ad bhī dasht-e-balā meñ merā 'husain'

dikhā.ī detā hai hujjat tamām kartā huā

main apne ishq ko KHush-e-ehtimam karta hua

maqam-e-shukr pe pahuncha kalam karta hua

ye gard-baad salamat guzarna chahta hai

mere charagh pe wahshat tamam karta hua

guzar raha hun kisi qariya-e-malamat se

qadim silsila-dari ko aam karta hua

to phir ye kaun hai nisfunnahaar ke hangam

qayam o raqs ki haalat mein sham karta hua

kabhi to khul ke bata ai meri riyazat-e-marg

main kaisa lagta hun fikr-e-dawam karta hua

zamanon baad bhi dasht-e-bala mein mera 'husain'

dikhai deta hai hujjat tamam karta hua