میں اپنے جسم سے باہر کھڑا ہوں

میں اپنے جسم سے باہر کھڑا ہوں

خود اپنے آپ ہی کو ڈھونڈھتا ہوں

میں کس کی گونج ہوں کس کی صدا ہوں

یہ اکثر سوچتا ہوں میں کہ کیا ہوں

میں سنگ راہ ہوں یا نقش پا ہوں

کئی پیروں تلے روندا گیا ہوں

بہت پیاسا ہوں ساحل پہ کھڑا ہوں

نگاہوں سے سمندر ناپتا ہوں

سکھاتی ہے پروں کو دھوپ جس پر

میں وہ اک زرد پتا بن گیا ہوں

پہن کر لفظ و معنی کے لبادے

بہت دن سے کتابوں میں پڑا ہوں

کئی چہرے نظر آتے ہیں جس میں

میں وہ ٹوٹا ہوا سا آئنہ ہوں

ہر اک شے نیند میں ڈوبی ہوئی ہے

بس اک میں ہی یہاں پر جاگتا ہوں