main apne par bhi uDanen bhi KHud banaungi

maiñ apne par bhī uḌāneñ bhī ḳhud banā.ūñgī

nishāna letī kamāneñ bhī ḳhud banā.ūñgī

havā se faiz kī ummīd tak nahīñ mujh ko

so ūñchī nīchī uḌāneñ bhī ḳhud banā.ūñgī

maiñ harf likhūñgī pahle varaq pe ghāyal sā

phir us kī zaḳhm kī tāneñ bhī ḳhud banā.ūñgī

mukālima bhī nayā hogā aapsī sab kā

jahān-e-nau kī zabāneñ ḳhud banā.ūñgī

maiñ munhadim karūñgī sab ġhanīm dīvāreñ

qile ke gird chaTTāneñ bhī ḳhud banā.ūñgī

hañsī ko maiñ ne hī show-case meñ sajā diyā thā

aur ab ḳhushī kī dukāneñ bhī ḳhud banā.ūñgī

kahīñ se milte haiñ pātāl ab ta.alluq ke

maiñ ye amiiq Dhalāneñ bhī ḳhud banā.ūñgī

main apne par bhi uDanen bhi KHud banaungi

nishana leti kamanen bhi KHud banaungi

hawa se faiz ki ummid tak nahin mujh ko

so unchi nichi uDanen bhi KHud banaungi

main harf likhungi pahle waraq pe ghayal sa

phir us ki zaKHm ki tanen bhi KHud banaungi

mukalima bhi naya hoga aapsi sab ka

jahan-e-nau ki zabanen KHud banaungi

main munhadim karungi sab ghanim diwaren

qile ke gird chaTTanen bhi KHud banaungi

hansi ko main ne hi show-case mein saja diya tha

aur ab KHushi ki dukanen bhi KHud banaungi

kahin se milte hain patal ab talluq ke

main ye amiq Dhalanen bhi KHud banaungi