main apne shahr mein apna hi chehra kho baiTha

maiñ apne shahr meñ apnā hī chehra kho baiThā

ye vāqi.a jo sunāyā to vo bhī ro baiThā

tumhārī aas meñ āñkhoñ ko maiñ bhigo baiThā

ki dil meñ yaas ke kāñTe ka.ī chubho baiThā

matā-e-hāl na maazī kā koī sarmāya

nadī meñ vaqt kī har chiiz ko Dubo baiThā

sunahre vaqt kī tahrīreñ jin meñ thiiñ mahfūz

maiñ un sahīfoñ ko ashkoñ se apne dho baiThā

maiñ suntā rahtā thā jis aa.ine kī sargoshī

vo shahr-e-sañg meñ apnī jilā bhī kho baiThā

kisī babūl ke saa.e tale milī jo amaañ

to apne paañv meñ kāñTe bhī maiñ chubho baiThā

vahī rahā hai bahar-taur shādmāñ 'nayyar'

jo apne ġham meñ ġham-e-dīgarāñ samo baiThā

main apne shahr mein apna hi chehra kho baiTha

ye waqia jo sunaya to wo bhi ro baiTha

tumhaari aas mein aankhon ko main bhigo baiTha

ki dil mein yas ke kanTe kai chubho baiTha

mata-e-haal na mazi ka koi sarmaya

nadi mein waqt ki har chiz ko Dubo baiTha

sunahre waqt ki tahriren jin mein thin mahfuz

main un sahifon ko ashkon se apne dho baiTha

main sunta rahta tha jis aaine ki sargoshi

wo shahr-e-sang mein apni jila bhi kho baiTha

kisi babul ke sae tale mili jo aman

to apne panw mein kanTe bhi main chubho baiTha

wahi raha hai bahar-taur shadman 'nayyar'

jo apne gham mein gham-e-digaran samo baiTha