میں اپنے شہر سے بھاگا ہوا اکیلا ہوں

میں اپنے شہر سے بھاگا ہوا اکیلا ہوں

اسی لیے تو میں سب سے ذرا اکیلا ہوں

کڑی ہے دھوپ شجر راہ کا اکیلا ہوں

میں پانیوں میں جزیرہ نما اکیلا ہوں

قصوروار تباہی کا میں ہی ٹھہروں گا

دریچے بند سبھی میں کھلا اکیلا ہوں

مجھی پہ چل کے اگر جا سکو تو پہنچو گے

میں پر خطر ہی سہی راستہ اکیلا ہوں

ہوا سے مجھ کو بچا لو کہ اب ضروری ہے

اندھیری رات کا روشن دیا اکیلا ہوں

ہوئے ہیں ہیچ دلیل و بیاں مرے آگے

میں پتھروں پہ کھدا فیصلہ اکیلا ہوں