main apni haisiyat se kuchh ziyaada le ke aaya hun

maiñ apnī haisiyat se kuchh ziyāda le ke aaya huuñ

maiñ qatra huuñ magar hamrāh dariyā le ke aaya huuñ

mire mālik tū mujh aasī pe bhī nazar-e-karam kar de

koī ik TūTā-phūTā maiñ bhī sajda le ke aaya huuñ

mujhe bhī kuchh atā kar de ujālā bāñTne vaale

tirī ḳhidmat meñ tamhīd-e-tamannā le ke aaya huuñ

tumhārī aañkh ke raste tumhāre dil meñ utrūñgā

maiñ azm-o-hausla puḳhta irāda le ke aaya huuñ

ajal ne kaam apnā kar diyā rishvat nahīñ khaa.ī

maiñ kaafī der tak chīḳhā ki paisa le ke aaya huuñ

chale aao ki pahle kī tarah mātam kareñ mil kar

maiñ apne dil ke armānoñ kā lāsha le ke aaya huuñ

mujhe har haal meñ tārīkiyoñ kā sar kuchalnā hai

hathelī par ugā kar chāñd taarā le ke aaya huuñ

mirī tahrīr se 'sāġhar' abhī tak ḳhuuñ Tapaktā hai

maiñ in kāġhaz ke TukḌoñ meñ kaleja le ke aaya huuñ

main apni haisiyat se kuchh ziyaada le ke aaya hun

main qatra hun magar hamrah dariya le ke aaya hun

mere malik tu mujh aasi pe bhi nazar-e-karam kar de

koi ek TuTa-phuTa main bhi sajda le ke aaya hun

mujhe bhi kuchh ata kar de ujala banTne wale

teri KHidmat mein tamhid-e-tamanna le ke aaya hun

tumhaari aankh ke raste tumhaare dil mein utrunga

main azm-o-hausla puKHta irada le ke aaya hun

ajal ne kaam apna kar diya rishwat nahin khai

main kafi der tak chiKHa ki paisa le ke aaya hun

chale aao ki pahle ki tarah matam karen mil kar

main apne dil ke armanon ka lasha le ke aaya hun

mujhe har haal mein tarikiyon ka sar kuchalna hai

hatheli par uga kar chand tara le ke aaya hun

meri tahrir se 'saghar' abhi tak KHun Tapakta hai

main in kaghaz ke TukDon mein kaleja le ke aaya hun