main apni haisiyat se kuchh ziyaada le ke aaya hun

maiñ apnī haisiyat se kuchh ziyāda le ke aayā huuñ

maiñ qatra huuñ magar hamrāh dariyā le ke aayā huuñ

mujhe bhī kuchh attār kar de ujālā bāñTne vaale

tirī ḳhidmat meñ tamhīd-e-tamannā le ke aayā huuñ

tumhārī aañkh ke raste tumhāre dil meñ utrūñgā

maiñ azm-o-hausla puḳhta irāda le ke aayā huuñ

ajal ne kaam apnā kar diyā rishvat nahīñ khaa.ī

maiñ kaafī der tak chīḳhā ki paisa le ke aayā huuñ

chale aao ki pahle kī tarah mātam kareñ mil kar

maiñ apne dil ke armānoñ kā lāsha le ke aayā huuñ

mujhe har haal meñ tārīkiyoñ kā sar kuchalnā hai

hathelī par ugā kar chāñd taarā le ke aayā huuñ

mirī tahrīr se 'sāġhar' abhī tak ḳhuuñ Tapaktā hai

maiñ in kāġhaz ke TukḌoñ meñ kaleja le ke aayā huuñ

main apni haisiyat se kuchh ziyaada le ke aaya hun

main qatra hun magar hamrah dariya le ke aaya hun

mujhe bhi kuchh attar kar de ujala banTne wale

teri KHidmat mein tamhid-e-tamanna le ke aaya hun

tumhaari aankh ke raste tumhaare dil mein utrunga

main azm-o-hausla puKHta irada le ke aaya hun

ajal ne kaam apna kar diya rishwat nahin khai

main kafi der tak chiKHa ki paisa le ke aaya hun

chale aao ki pahle ki tarah matam karen mil kar

main apne dil ke armanon ka lasha le ke aaya hun

mujhe har haal mein tarikiyon ka sar kuchalna hai

hatheli par uga kar chand tara le ke aaya hun

meri tahrir se 'saghar' abhi tak KHun Tapakta hai

main in kaghaz ke TukDon mein kaleja le ke aaya hun