main apni jang mein tan-e-tanha sharik tha

maiñ apnī jañg meñ tan-e-tanhā sharīk thā

dushman ke saath saarā zamāna sharīk thā

injīr o shiir bāñTtā phirtā hai shahr meñ

kal tak jo merī nān-e-javīñ kā sharīk thā

mere ḳhilāf hai vo gavāhī meñ pesh pesh

mansūba-bandiyoñ meñ jo merā sharīk thā

mere qisās kā bhī huā hai vo mudda.ī

jo mere qatl meñ pas-e-parda sharīk thā

kār-e-jahāñ meñ bhī vahī merā sharīk hai

dukh-dard meñ jo lamha-ba-lamha sharīk thā

kashtī ke Dūbne kā mujhe ġham nahīñ magar

maujoñ kī sāz-bāz meñ dariyā sharīk thā

had ho ga.ī thī ham se mohabbat meñ kufr kī

jaise ḳhudā-na-ḳhvāsta vo lā-sharīk thā

'tishna' ye tujh ko sañg-e-malāmat usī ke haiñ

pindār-e-ishq meñ jo anā kā sharīk thā

main apni jang mein tan-e-tanha sharik tha

dushman ke sath sara zamana sharik tha

injir o shir banTta phirta hai shahr mein

kal tak jo meri nan-e-jawin ka sharik tha

mere KHilaf hai wo gawahi mein pesh pesh

mansuba-bandiyon mein jo mera sharik tha

mere qisas ka bhi hua hai wo muddai

jo mere qatl mein pas-e-parda sharik tha

kar-e-jahan mein bhi wahi mera sharik hai

dukh-dard mein jo lamha-ba-lamha sharik tha

kashti ke Dubne ka mujhe gham nahin magar

maujon ki saz-baz mein dariya sharik tha

had ho gai thi hum se mohabbat mein kufr ki

jaise KHuda-na-KHwasta wo la-sharik tha

'tishna' ye tujh ko sang-e-malamat usi ke hain

pindar-e-ishq mein jo ana ka sharik tha