main apni KHak ko jab aaina banata hun

maiñ apnī ḳhaak ko jab aa.ina banātā huuñ

to is ke vāste dil bhī nayā banātā huuñ

har ik parind rahe tā-abad yahāñ shādāb

isī liye maiñ shajar bhī harā banātā huuñ

bhaTak na jaa.e kahīñ shahr-e-ġham meñ apnā dil

so tere ḳhvāb ko maiñ rahnumā banātā huuñ

kare na kyuuñ ye tire dil meñ ghar mire hamdam

maiñ apne sher ko dard-āshnā banātā huuñ

maiñ pahle bhartā huuñ us dil meñ vahshateñ aur phir

savād-e-dasht ko bhī ham-navā banātā huuñ

vo fā.elāt-o-mafā.īl ke nahīñ bas meñ

maiñ apne sher meñ jo zāviya banātā huuñ

talāsh kartī haiñ ḳhud manzileñ jise 'ahmad'

maiñ dasht-e-shauq meñ vo rāsta banātā huuñ

main apni KHak ko jab aaina banata hun

to is ke waste dil bhi naya banata hun

har ek parind rahe ta-abad yahan shadab

isi liye main shajar bhi hara banata hun

bhaTak na jae kahin shahr-e-gham mein apna dil

so tere KHwab ko main rahnuma banata hun

kare na kyun ye tere dil mein ghar mere hamdam

main apne sher ko dard-ashna banata hun

main pahle bharta hun us dil mein wahshaten aur phir

sawad-e-dasht ko bhi ham-nawa banata hun

wo faelat-o-mafail ke nahin bas mein

main apne sher mein jo zawiya banata hun

talash karti hain KHud manzilen jise 'ahmad'

main dasht-e-shauq mein wo rasta banata hun