main baDhata ja raha tha is liye daftar ki baat

maiñ baḌhātā jā rahā thā is liye daftar kī baat

biich chaurāhe meñ laa.ī jā rahī thī ghar kī baat

ab to apnī guftugū hotī hai us se is tarah

jaise ik mātaht se hotī hai ik afsar kī baat

ālam-e-maujūd se bāhar nikal ke sochiye

gumbad-e-be-dar kī bāteñ aur pas-e-manzar kī baat

shā'irī ne baat kahne kī suhūlat dī mujhe

varna maiñ bāhar na lā paatā kabhī andar kī baat

shaah aur begam kī bāteñ ho chukī hoñ ḳhatm to

kījiye hālāt ke maare hue joker kī baat

ijtimā-e-ḳhās meñ us kā mujhe kahnā 'azīz'

maiñ samajhtā huuñ ye hai mere liye honour kī baat

main baDhata ja raha tha is liye daftar ki baat

bich chaurahe mein lai ja rahi thi ghar ki baat

ab to apni guftugu hoti hai us se is tarah

jaise ek mataht se hoti hai ek afsar ki baat

aalam-e-maujud se bahar nikal ke sochiye

gumbad-e-be-dar ki baaten aur pas-e-manzar ki baat

sha'iri ne baat kahne ki suhulat di mujhe

warna main bahar na la pata kabhi andar ki baat

shah aur begam ki baaten ho chuki hon KHatm to

kijiye haalat ke mare hue joker ki baat

ijtima-e-KHas mein us ka mujhe kahna 'aziz'

main samajhta hun ye hai mere liye honour ki baat