main bahut dushwar hun aasan kar dije mujhe

maiñ bahut dushvār huuñ āsān kar diije mujhe

fat.h kar liije mujhe hairān kar diije mujhe

maiñ bahut bikhrā paḌā huuñ mujh ko yakjā kījiye

bas ḳhudā ban kar nayā insān kar diije mujhe

aap agar apnā badan mujh ko 'ināyat kījiye

ḳhaak huuñ maiñ ḳhaak hī meñ saan kar diije mujhe

bas yahī marz-e-farāmoshī mujhe bhī chāhiye

dauḌ kar chhū lījiye nisyān kar diije mujhe

phailte rahiye mire andar udāsī kī tarah

aur ik shab sūrat-e-hizyān kar diije mujhe

aap gar haiñ saaf to is kī zarūrat hī nahīñ

aap maile haiñ to ḳhud ko chhān kar diije mujhe

rozgār-e-‘ishq bhī ik kaam hai lekin huzūr

aap apne ghar kā ik darbān kar diije mujhe

maiñ baḌā daanā banā phirtā huuñ mere zo'm ko

toḌ kar rakh dījiye nādān kar diije mujhe

main bahut dushwar hun aasan kar dije mujhe

fath kar lije mujhe hairan kar dije mujhe

main bahut bikhra paDa hun mujh ko yakja kijiye

bas KHuda ban kar naya insan kar dije mujhe

aap agar apna badan mujh ko 'inayat kijiye

KHak hun main KHak hi mein san kar dije mujhe

bas yahi marz-e-faramoshi mujhe bhi chahiye

dauD kar chhu lijiye nisyan kar dije mujhe

phailte rahiye mere andar udasi ki tarah

aur ek shab surat-e-hizyan kar dije mujhe

aap gar hain saf to is ki zarurat hi nahin

aap maile hain to KHud ko chhan kar dije mujhe

rozgar-e-‘ishq bhi ek kaam hai lekin huzur

aap apne ghar ka ek darban kar dije mujhe

main baDa dana bana phirta hun mere zo'm ko

toD kar rakh dijiye nadan kar dije mujhe