main bataun ishq kya hai ek paiham iztirab

maiñ batā.ūñ ishq kyā hai ek paiham iztirāb

dhīmī dhīmī aañch kahiye yā musalsal iltihāb

raat vo aa.e the chehre se naqāb ulTe hue

maiñ to hairāñ thā nikal aayā kidhar se āftāb

dil pe un ke rū-e-raushan kā paḌā hai jab se aks

dil nahīñ hai balki siine meñ hai raushan māhtāb

un ke dīvānoñ kā istiqbāl hai dār-o-rasan

khiñch gayā jo daar par un ke liye vo kāmyāb

kyā mirī hamd-o-sanā aur kyā mirā shukr-o-sipās

un ke ehsāñ be-shumār aur un kī ne.amat be-hisāb

raat kā pichhlā pahar thā aur aañsū kī jhaḌī

merā dil thā shāyad un kī bārgah meñ bāryāb

ishq kī duniyā meñ aise hādsoñ se kyā mafar

aayā qāsid kā janāza mere naame kā javāb

ye mahal merī tamannāoñ kā ai ‘ahmad-urūj'

jaise bachchoñ kā gharauñdā jaise dīvāne kā ḳhvāb

main bataun ishq kya hai ek paiham iztirab

dhimi dhimi aanch kahiye ya musalsal iltihab

raat wo aae the chehre se naqab ulTe hue

main to hairan tha nikal aaya kidhar se aaftab

dil pe un ke ru-e-raushan ka paDa hai jab se aks

dil nahin hai balki sine mein hai raushan mahtab

un ke diwanon ka istiqbaal hai dar-o-rasan

khinch gaya jo dar par un ke liye wo kaamyab

kya meri hamd-o-sana aur kya mera shukr-o-sipas

un ke ehsan be-shumar aur un ki neamat be-hisab

raat ka pichhla pahar tha aur aansu ki jhaDi

mera dil tha shayad un ki bargah mein baryab

ishq ki duniya mein aise hadson se kya mafar

aaya qasid ka janaza mere name ka jawab

ye mahal meri tamannaon ka ai ‘ahmad-uruj'

jaise bachchon ka gharaunda jaise diwane ka KHwab