main be-zaban hun use KHu hai sawal ki

maiñ be-zabān huuñ use ḳhū hai savāl kī

kaise nikal sake koī sūrat visāl kī

kaise batā.ūñ maiñ ki vo kitnā hasīn hai

aajiz haiñ vus.ateñ mire ḳhvāb-o-ḳhayāl kī

itnā vo merī zaat se ġhāfil kabhī na thā

shāyad ḳhabar na hogī use mere haal kī

tirchhī sī ik nigāh bhī muusā na sah sakā

phir kis meñ taab ho tire husn-o-jamāl kī

maut-o-hayāt hai tirī an-ban kā falsafa

tamsīl ye bhī hai tire Dhab terī chaal kī

jab se khulī taġhayyur-e-āfāq kī girah

tartīb khul ga.ī hai tirī chāl-Dhāl kī

bil-farz do-jahāñ tirā sadqa utaar duuñ

qīmat na de sakūñgā tire ek baal kī

kab tak jiyūñ maiñ tere binā tere shahr meñ

din ik sadī kā hotā hai raat ek saal kī

ye aur baat kuchh bhī tavārud meñ aa paḌe

tuf hai jo bhiik māñgūñ kisī se ḳhayāl kī

'vāqif' us aadmī ke nasab meñ bigāḌ hai

azmat jo bhuul baiThā mohammad kī aal kī

main be-zaban hun use KHu hai sawal ki

kaise nikal sake koi surat visal ki

kaise bataun main ki wo kitna hasin hai

aajiz hain wusaten mere KHwab-o-KHayal ki

itna wo meri zat se ghafil kabhi na tha

shayad KHabar na hogi use mere haal ki

tirchhi si ek nigah bhi musa na sah saka

phir kis mein tab ho tere husn-o-jamal ki

maut-o-hayat hai teri an-ban ka falsafa

tamsil ye bhi hai tere Dhab teri chaal ki

jab se khuli taghayyur-e-afaq ki girah

tartib khul gai hai teri chaal-Dhaal ki

bil-farz do-jahan tera sadqa utar dun

qimat na de sakunga tere ek baal ki

kab tak jiyun main tere bina tere shahr mein

din ek sadi ka hota hai raat ek sal ki

ye aur baat kuchh bhi tawarud mein aa paDe

tuf hai jo bhik mangun kisi se KHayal ki

'waqif' us aadmi ke nasab mein bigaD hai

azmat jo bhul baiTha mohammad ki aal ki