main bhi raushan hun jamal-e-ruKH-e-jaanan mein kahin

maiñ bhī raushan huuñ jamāl-e-ruḳh-e-jānāñ meñ kahīñ

ḳhaak parvāna bhī hai sho.ala-e-uryāñ meñ kahīñ

kisī paikar meñ bhī pahchān nahīñ hai us kī

kyā surāġh us kā mile dasht-o-gulistāñ meñ kahīñ

hijr ke daaġh meñ tabdīl huā lamha-e-vasl

thī kamī koī mire shauq-e-farāvāñ meñ kahīñ

jal gayā baaġh magar sham-e-numū-ḳhez kī lau

sabz hai har shajar-e-soḳhta-sāmāñ meñ kahīñ

mujh ko sho.aloñ meñ bhī jiine kā sikhātā hai hunar

ik samundar mire ātish-kada-e-jāñ meñ kahīñ

apnī vahshat kā ġhubār uThte hue dekhtā huuñ

maiñ bhī huuñ apne hī āhū-e-gurezāñ meñ kahīñ

'ishrat' ik harf-e-bashārat thī vo āvāz-e-qadam

ik charāġh aur jalā ḳhāna-e-imkāñ meñ kahīñ

main bhi raushan hun jamal-e-ruKH-e-jaanan mein kahin

KHak parwana bhi hai shoala-e-uryan mein kahin

kisi paikar mein bhi pahchan nahin hai us ki

kya suragh us ka mile dasht-o-gulistan mein kahin

hijr ke dagh mein tabdil hua lamha-e-wasl

thi kami koi mere shauq-e-farawan mein kahin

jal gaya bagh magar sham-e-numu-KHez ki lau

sabz hai har shajar-e-soKHta-saman mein kahin

mujh ko shoalon mein bhi jine ka sikhata hai hunar

ek samundar mere aatish-kada-e-jaan mein kahin

apni wahshat ka ghubar uThte hue dekhta hun

main bhi hun apne hi aahu-e-gurezan mein kahin

'ishrat' ek harf-e-bashaarat thi wo aawaz-e-qadam

ek charagh aur jala KHana-e-imkan mein kahin