main bikhar jaun sameTen mujhe uski aankhen

maiñ bikhar jā.ūñ sameTeñ mujhe us kī āñkheñ

apnī palkoñ pe sajā leñ mujhe us kī āñkheñ

ruuTh jā.ūñ to ishāre se manā leñ mujh ko

aur kho jā.ūñ to DhūñDeñ mujhe us kī āñkheñ

ghar kī dahlīz se lag kar mirā rasta dekheñ

der se aa.uuñ to boleñ mujhe us kī āñkheñ

rāt-bhar mere ta'āqub meñ phireñ galiyoñ meñ

sub.h ho jaa.e to ro.eñ mujhe us kī āñkheñ

ghar meñ mil jaa.eñ to chhup jaa.eñ mirī āñkhoñ se

raah meñ paa.eñ to chheḌeñ mujhe us kī āñkheñ

maiñ jo chhup jā.ūñ kabhī raat kī tārīkī meñ

apnī palkoñ se TaToleñ mujhe us kī āñkheñ

ḳhatm ho jaa.e ye hoñToñ ke jazīroñ kā safar

pyaas bujh jaa.e Dubo deñ mujhe us kī āñkheñ

ab yahāñ koī nahīñ rahtā magar phir bhī 'shakīl'

jaise khiḌkī se pukāreñ mujhe us kī āñkheñ

main bikhar jaun sameTen mujhe us ki aankhen

apni palkon pe saja len mujhe us ki aankhen

ruTh jaun to ishaare se mana len mujh ko

aur kho jaun to DhunDen mujhe us ki aankhen

ghar ki dahliz se lag kar mera rasta dekhen

der se aaun to bolen mujhe us ki aankhen

raat-bhar mere ta'aqub mein phiren galiyon mein

subh ho jae to roen mujhe us ki aankhen

ghar mein mil jaen to chhup jaen meri aankhon se

rah mein paen to chheDen mujhe us ki aankhen

main jo chhup jaun kabhi raat ki tariki mein

apni palkon se TaTolen mujhe us ki aankhen

KHatm ho jae ye honTon ke jaziron ka safar

pyas bujh jae Dubo den mujhe us ki aankhen

ab yahan koi nahin rahta magar phir bhi 'shakil'

jaise khiDki se pukaren mujhe us ki aankhen