main Dar raha hun har ek imtihan se pahle

maiñ Dar rahā huuñ har ik imtihān se pahle

mire paroñ ko huā kyā uḌaan se pahle

mire nasīb meñ rastoñ kī dhuul likkhī thī

na mil sakī mujhe manzil takān se pahle

ye kaun shaḳhs thā chālāk kis qadar niklā

ki baat chheḌ gayā darmiyān se pahle

maiñ us ke dard kā darmāñ to jāntā thā magar

vo kuchh to boltā apnī zabān se pahle

tum us ke ghar kī taraf chal paḌe to ho lekin

koī paḌāv nahīñ āsmān se pahle

khaḌā huuñ aaj maiñ 'anjum' yaqīñ kī sarhad par

ajiib karb meñ gum thā gumān se pahle

main Dar raha hun har ek imtihan se pahle

mere paron ko hua kya uDan se pahle

mere nasib mein raston ki dhul likkhi thi

na mil saki mujhe manzil takan se pahle

ye kaun shaKHs tha chaalak kis qadar nikla

ki baat chheD gaya darmiyan se pahle

main us ke dard ka darman to jaanta tha magar

wo kuchh to bolta apni zaban se pahle

tum us ke ghar ki taraf chal paDe to ho lekin

koi paDaw nahin aasman se pahle

khaDa hun aaj main 'anjum' yaqin ki sarhad par

ajib karb mein gum tha guman se pahle