main Dara nahin main daba nahin mein jhuka nahin main bika nahin

maiñ Darā nahīñ maiñ dabā nahīñ meñ jhukā nahīñ maiñ bikā nahīñ

magar ahl-e-bazm meñ koī bhī to adā-shanās-e-vafā nahīñ

mire jism-o-jāñ pe usī ke saare azaab saare savāb haiñ

vahī ek harf-e-ḳhud-āgahī ki abhī jo maiñ ne kahā nahīñ

na vo harf-o-lafz kī dāvarī na vo zikr o fikr-e-qalandarī

jo mire lahū se likhī thī ye vo qarārdād-e-vafā nahīñ

abhī husn o ishq meñ fāsle adam-e'timād ke haiñ vahī

unheñ aitabār-e-vafā nahīñ mujhe aitabār-e-jafā nahīñ

vo jo ek baat thī guftanī vahī ek baat shunīdnī

jise maiñ ne tum se kahā nahīñ jise tum ne mujh se sunā nahīñ

maiñ salīb-e-vaqt pe kab se huuñ mujhe ab to is se utaar lo

ki sazā bhī kaaT chukā huuñ maiñ mirā faisla bhī huā nahīñ

mirā shahr mujh pe gavāh hai ki har ek ahd-e-siyāh meñ

vo charāġh-e-rāh-e-vafā huuñ maiñ ki jalā to jal ke bujhā nahīñ

main Dara nahin main daba nahin mein jhuka nahin main bika nahin

magar ahl-e-bazm mein koi bhi to ada-shanas-e-wafa nahin

mere jism-o-jaan pe usi ke sare azab sare sawab hain

wahi ek harf-e-KHud-agahi ki abhi jo main ne kaha nahin

na wo harf-o-lafz ki dawari na wo zikr o fikr-e-qalandari

jo mere lahu se likhi thi ye wo qarardad-e-wafa nahin

abhi husn o ishq mein fasle adam-e'timad ke hain wahi

unhen aitabar-e-wafa nahin mujhe aitabar-e-jafa nahin

wo jo ek baat thi guftani wahi ek baat shunidni

jise main ne tum se kaha nahin jise tum ne mujh se suna nahin

main salib-e-waqt pe kab se hun mujhe ab to is se utar lo

ki saza bhi kaT chuka hun main mera faisla bhi hua nahin

mera shahr mujh pe gawah hai ki har ek ahd-e-siyah mein

wo charagh-e-rah-e-wafa hun main ki jala to jal ke bujha nahin