main DhunDhta hun jise aaj bhi hawa ki tarah

maiñ DhūñDhtā huuñ jise aaj bhī havā kī tarah

vo kho gayā hai ḳhalā meñ mirī sadā kī tarah

na pūchh mujh se mirā qissa-e-zavāl-e-junūñ

maiñ pāniyoñ pe barastā rahā ghaTā kī tarah

tamām umr rahā huuñ maiñ jism meñ mahsūr

tamām umr kaTī hai mirī sazā kī tarah

utaar de koī mujh par se ye badan kī ridā

ki maar Daale mujhe bhī mire ḳhudā kī tarah

nikhartā jaa.e yūñhī rañg-e-shām ai 'pāshī'

bikhartā jā.ūñ yuuñ hī maiñ gul-e-navā kī tarah

main DhunDhta hun jise aaj bhi hawa ki tarah

wo kho gaya hai KHala mein meri sada ki tarah

na puchh mujh se mera qissa-e-zawal-e-junun

main paniyon pe barasta raha ghaTa ki tarah

tamam umr raha hun main jism mein mahsur

tamam umr kaTi hai meri saza ki tarah

utar de koi mujh par se ye badan ki rida

ki mar Dale mujhe bhi mere KHuda ki tarah

nikharta jae yunhi rang-e-sham ai 'pashi'

bikharta jaun yun hi main gul-e-nawa ki tarah