میں ڈھونڈھتا ہوں کسے بار بار کیا کہئے

میں ڈھونڈھتا ہوں کسے بار بار کیا کہئے

تڑپ تڑپ کے شب انتظار کیا کہئے

یہ انقلاب زمانہ یہ گردش دوراں

بنا ہے دشمن جاں غم گسار کیا کہئے

فریب خوردۂ رہبر سمجھ سکے یہ راز

کسی سے ان کے سوا حال زار کیا کہئے

چمن کے پھول پہ جس کا ہے حق وہی بلبل

قفس میں بند ہے وقت بہار کیا کہئے

یہ حد جہاں میں ہے اپنی سیاہ بختی کی

بجھا بجھا ہے چراغ مزار کیا کہئے

غم حیات سے فرصت نہیں ہے اک لمحہ

کسی سے حال غم روزگار کیا کہئے

خزاں‌ بدوش گلستان آرزو میں جلالؔ

کبھی تو آ کے ہے رہنا بہار کیا کہئے