main duniya ki KHatir hun dil hone wala

maiñ duniyā kī ḳhātir huuñ dil hone vaalā

mirā ahd hai mustaqil hone vaalā

ḳhudā aisā tanhā kisī ko na rakkhe

koī bhī na ho jab muḳhil hone vaalā

pas-e-āb-o-gil maiñ dikhā bhī chukā huuñ

tamāshā sar-e-āb-o-gil hone vaalā

safīne bhare aa rahe haiñ barābar

hai dariyā kahīñ muntaqil hone vaalā

vahī ek ham haiñ vahī ek tum ho

ye aalam nahīñ mo.atadil hone vaalā

lahū ke kināre bhī zad par haiñ donoñ

ye kyā zaḳhm hai mundamil hone vaalā

mirī raakh dekho to kyā mutma.in hai

maiñ ik shaḳhs thā mushta.il hone vaalā

main duniya ki KHatir hun dil hone wala

mera ahd hai mustaqil hone wala

KHuda aisa tanha kisi ko na rakkhe

koi bhi na ho jab muKHil hone wala

pas-e-ab-o-gil main dikha bhi chuka hun

tamasha sar-e-ab-o-gil hone wala

safine bhare aa rahe hain barabar

hai dariya kahin muntaqil hone wala

wahi ek hum hain wahi ek tum ho

ye aalam nahin moatadil hone wala

lahu ke kinare bhi zad par hain donon

ye kya zaKHm hai mundamil hone wala

meri rakh dekho to kya mutmain hai

main ek shaKHs tha mushtail hone wala