main dushmani hun mohabbat hun ajnabi hun main

maiñ dushmanī huuñ mohabbat huuñ ajnabī huuñ maiñ

yahī subūt haiñ mere ki aadmī huuñ maiñ

bujhā sakegā na mujh ko tamām āb-e-jahāñ

miyān-e-dasht bahattar kī tishnagī huuñ maiñ

mirā ḳhayāl mirī soch hai kitāb mirī

ḳhudā-e-fikr kā bhejā huā nabī huuñ maiñ

nigāh kī na ḳhilāf-e-sharī.at-e-adabī

kisī ke husn-e-ġhazal par ki muttaqī huuñ maiñ

mire ḳhayāl se raushan hai koh-e-tūr-e-adab

uḌeñ na hosh to dekho vo raushnī huuñ maiñ

mujhī se bolnā sīkhā hai gūñge harfoñ ne

maiñ rūh-e-nutq huuñ lafzoñ kī zindagī huuñ maiñ

luTā rahā hai mazāmīn-e-nau ke jo ambār

zamāna kahtā hai 'kāzim' vahī saḳhī huuñ maiñ

main dushmani hun mohabbat hun ajnabi hun main

yahi subut hain mere ki aadmi hun main

bujha sakega na mujh ko tamam aab-e-jahan

miyan-e-dasht bahattar ki tishnagi hun main

mera KHayal meri soch hai kitab meri

KHuda-e-fikr ka bheja hua nabi hun main

nigah ki na KHilaf-e-shariat-e-adabi

kisi ke husn-e-ghazal par ki muttaqi hun main

mere KHayal se raushan hai koh-e-tur-e-adab

uDen na hosh to dekho wo raushni hun main

mujhi se bolna sikha hai gunge harfon ne

main ruh-e-nutq hun lafzon ki zindagi hun main

luTa raha hai mazamin-e-nau ke jo ambar

zamana kahta hai 'kazim' wahi saKHi hun main