میں ایک آتش غم کی خبر کے پیچھے ہوں

میں ایک آتش غم کی خبر کے پیچھے ہوں

اسی سے ٹوٹے ہوئے اک شرر کے پیچھے ہوں

بہت ہی اجنبی دستک ہے سن رہا ہوں اسے

اور ایک ڈر میں گرفتار در کے پیچھے ہوں

کسے تو ڈھونڈھتا پھرتا ہے سرد کمروں میں

میں دھوپ سے بھرے میداں میں گھر کے پیچھے ہوں

زیادہ ٹھیک ہے واماندگی اسے کہنا

جو کہہ رہا ہوں کہ میں رہ گزر کے پیچھے ہوں

ہیں ماہ و سال ہی ایسے سمجھ نہیں آتی

کہ آگے شام کے ہوں یا سحر کے پیچھے ہوں

یہ خونیں کھیل ہے روز ازل سے جاری ہے

وہ میری جان کے میں اس کے سر کے پیچھے ہوں

یہ تیر مرگ ہے ممکن نکلنا اس سے نہیں

یہیں کہیں میں کسی ایک در کے پیچھے ہوں

حسب سے نام سے عزت سے مجھ کو کیا لینا

ہوس کا بندہ ہوں بس مال و زر کے پیچھے ہوں

مرے کلام میں شاہیںؔ نہ کر تلاش مجھے

چھپا ہوا کسی دست ہنر کے پیچھے ہوں